Mandry tsy lavo loha ny mponina ao Antsirabe sy ny manodidina noho ny afitsoky ny asan-jiolahy. Tokantrano roa no indray voatafika ny alin’ny alatsinainy teo. Lehilahy lehibe avy nandray fisotroan-drononony, ny antoandron’io andro io, no lasibatra voalohany tao Ambohidravaka.
Alika nivovo no nanaitra ity rangahy ity. Raha iny izy namoha trano hijery ny zava-misy iny anefa dia tora-bato no nitsenan’ireto jiolahy ireto azy. Avy hatrany dia 12 lahy no nibosesika niditra. Voalaza anefa fa mbola nisy koa teo ivelany nanakana ireo fokonolona, izay saika hamonjy. Niezaka namaly rangahibe saingy saingy voadaroka no voavely vy izy noho ny hery tsy mitovy, ka naratra mafy ary tsaboina eny amin’ny hopitaly hatramin’izao. Araka ny loharanom-baovao dia vola Ar 1 tapitrisa sy ireo firavaka lafo vidy maro ary finday no lasan’ireto olon-dratsy. Vola Ar 5 hetsy, finday telo lafo vidy, lecteur, Canal Sat ary lamba lafovidy kosa indray no azon’ny jiolahy hafa tao Verezambola, tamin’io alina io ihany. Nongotan’ireto olon-dratsy ny vavahady ka rehefa tafiditra izy ireo dia nandratra ilay mpiandry tanàna, izay niezaka niantso vonjy.
Novelesin’izy ireo tamin’ny kibay ity farany ary avy eo dia nohidiny tao an-dakozia. Rehefa izany dia niditra tao amin’ilay « villa » izay nisy ny tompon-trano izy ireo ary nanao izay ho afany tamin’ny fandrobana. Vokatry ny fiambenana nataon’ireto jiolahy ireto dia tsy afa-namonjy ny manodidina. Niha-nahazo vahana indray ity fampihorohoroana sy fandrobana ity eto Antsirabe, raha niato kely izany taorian’ny fisamborana olona maro nataon’ny mpitandro ny filaminana.
Angola Ny Avo
